تجربة طالب في اختصاص تكنولوجيا المعلومات

انا عملت اومشولونغ مكثف بمجال تطوير البرمجيات

Fachinformatiker Anwendungsentwicklung

والحمد لله نجحت فيه كانت سنة ونص (6 شهور مدرسة وسنة شغل)

حابب فيد الناس اللي حابة تدخل هاد المجال من خلال هالمنشور هالحكي بينطبق ع الاومشولونغ والاوسبيلدونغ لانو بالنهاية نفس النتيجة

وان شالله اقدر فيدكم بهالكم معلومة من خلال خبرتي المتواضعة بهالمجال

أولا بالنسبة للقبول بهاد المجال

غالباً الشركات لح تطلب منك مستوى اللغة B1

وفي شركات ما بتقبل مستوى أقل من C1

وممكن شركات تقبل بال B1

لكن النسبة الغالبة لح تطلب اقل شي B2

لجانب اللغة من المحتمل جدا انو يختبروك من خلال فحص مبدئي ليشوفو امكانياتك وفهمك لهاد المجال للاسف ما فيني فيدكم بخصوص هاد الفحص لانو انا دخلت المجال من دونه بس حبيت اذكر هالشي كرمال غطي هلنقطة

بالنسبة للشي رح تاخدو بالمدرسة اثناء الاوسبيلدونغ رح تاخد دروس عن اساسيات الشبكات والهاردوير وهالدروس رح تكون مشتركة بينك وبين طلاب Fachinformatiker Systemintegration

بس التركيز الاكبر بهاد المجال هو ع البرمجة وقواعد البيانات

شو لغة البرمجة اللي لح تاخدها؟

هالشي لح يختلف من معهد لمعهد بس التدريس بيكون كالتالي:

رح تاخد Functional Programming

لغات البرمجة اللي لح تستخدمها واكتر شي بيتم تدريسها هي:

Haskell  و Clojure

ولح تاخد كمان ل Object Oriented Programming

غالباً رح تكون اللغة المستخدمة Java  و C#

ممكن تاخد ال Web development  يعني JavaScript, CSS, HTML

او تاخد معها فكرة ال FrameWorks  مثلاً REACT, VUE, ANGULAR ..

هون بدي وضح شغلة مهمة …

الفكرة بالتدريس هي انن يعطوك فكرة عامة عن البرمجة والفرق بين ادوات البرمجة والية عمل الفريم وورك يعني ما رح تاخد لغة برمجة من الالف الى الياء, رح يعطوك بس شي بيساعد لتكمل نفسك بنفسك وتفهم البرمجة اكتر

ونقطة تانية كتير مهمة بضيفها لهالشي:

أنو لغات البرمجة كلها من حيث المبدأ متشابهة الفرق بيكون بطريقة الكتالبة والغرض اللي بيتم استعمال اللغة منشانو

ركز عالشي اللي رح يلزمك بالشركة اللي رح تعمل عندها الاوسبيلدونغ ولا تضيع حالك وانت عم تحاول تتعلم اكتر لغة برمجة بنفس الوقت لانو رح تضيع وتضيع وقت كصير لح تندم عليه بعدين؟

موضوع تاني مهم بالنسبة لهالمجال هوة قواعد البيانات ولغة SQL

هي لغة التعامل مع قواعد البيانات وبيتم استعمالها بشكل عام عن باقي اللغات وباختصال لغة SQL رح تاخد عنها دروس بلاوسبيلدونغ بس بنصحك انك تتعمق فيها اكتر بالبيت لانو موضوع كتير مهم بالحياة العملية وبالامتحان كمان

بالنسبة للامتحان اتغير من 2021  عن النماذج اللي كانت قبل اولاعندك امتحان كتابي اسمو

Einrichten eines IT-gestützten Arbeitsplatzes

 هالامتحان بيكون مشترك ما بين جميع فروع الاي تي وبالتالي التركيز فيه بيكون عالنقاط المشتركة بهالمجال مثل Gannt Diagramm

Netzplantechnek

Projektmanagement

S. M. A. R. T Prinzip

واسئلة عامة عن حلول الهاردوير الي بتقترحها الشركة خلال متطلبات معينة يعني بيعرضو عليك حالة مع ميزانية محددة زببيشوفو كيف لح تتعامل وشو القطع اللي انت لح تجمعها وتقترحها للشركة بهيك حالة وهالشي ما بيقتصر بس علهاردوير بيتضمن حلول السوفتوير كمان

من ضمن هاد المجال بيجيك اسئلة عن Datenshutz  و Datensicherheit و RAID Systems  و Backup

وممكن تجيك اسئلة فيها حسابات للطاقة مثلا بالواط او الامبير او سؤال لتحسب الحجم المطلوب لحفظ ملف او صورة عالكمبيوتر الخ….

عندك بعدها امتحان كتابي مقسم لتلت اقسام وكل قسم بيشكل 10% من المجموع النهائي

اول قسم Planen eines Softwareproduktes

بكافة اشكالو هاد القسم بيعتمد بشكل اساسي عال UML عندك مثلاً:

Use Case Diagramm
Aktivität Diagramm
Klassen Diagramm

بيتضمن كمان اسئلة نظرية ما بتطلع عن مجال البرمجة مثلا كيف ممكن تخلي تطبيقك يناسب الاشخاص ذوي الاحتياجات الخاصة واسئلة من هذا القبيل كيف مثلاً ممكن تزيد ال Performance

القسم التاني اسمو

Entwicklung und Umsetzung von Algorithmen

التركيز هون بيكون علاحوارزميات وقواعد البيانات

بالنسبة للخوارزميات بيكون عندك حالة معينة ولازم تكتب PseudoCode  وفي عدة طرق لكتابتو:مثل هيك:

WENN X < 1 DANN …..
SOLANGE X > 1 …..

هي الطريقة التقليدية واللي كانت معتمدة سابقاً بشكل اساسي بس الحلو انو صار فيك تكتب وكأنك بتكتب كود عادي باي لغة برمجة مثلاً

f(x<1) {…..}
while(x > 1) {……}

في نقطة مهمة بالنسبة لهلسؤال رحح وضحها:

بيصير انك تستعمل Built-in Functions

مثل for each او map, filter, reduce

الخوارزمية تبعك لازم تكون مقتصرة بس علاساسيات المشتركة بين لغات البرمجة

نقطة تانية مهمة هوة قواعد البيانات ال ER Modell

وسؤال ولا بد منو عن ال SQL Abfragen يعني بتكتب اكواد SQL لعض او تعديل معلومات معينة اودمج جداول

القسم التالت اسمو:

Wirtschafts- und Sozialkunde

هاد بيكون عبارة عن اسئلة اتمتة وبتكون مشتركة بين الفرعين Anwendungsentwicklung و Systemintegration الاسئلة عن الضرائب والقوانين والعطل وال Marktformen, Organisationformen واسئلة عامة بتخص الاقتصاد

نجي للقسم اللي بيشكل 50% من المجموع الكلي

اللي بيكون عبارة عن مشروع انت بتعملو عبارة عن تطبيق وبتكتبو بحدود 30 صفحة Documentation في نماذج كتيره على الانترنت كل ما هنالك حط بغوغل Anwendungsentwicklung Projektdokumentation

ورح تلاقي نماذج لتاخد فكرة اكتر عن الموضوع وباختصار اول شي لح تكتب IHK تحكي فيه بشكل مختصر عن التطبيق اللي رح تعملو وتبعت لل Projectantrag وبتستنا القبول بعدين

لح تبرمجلك التطبيق وتوضح خطوات العمل تبعك وتوثق كل شي بالكتابة وبتقدم المشروع لل HK

لازم تبعتهم مع 3 وحدات تخزين 3 نسخ CD و USB

اخر شي واخر امتحان بيكون عبارة عن الامتحان الشفهي اللي بيكون عن هاد المشروع اللي انت برمجتو Präsentation وسلمتو لل HK

عندك 15 دقيقة لل Präsentation و 15 دقيقة لتجاوب على الاسئلة اللي لح يجاوبوك ياها الاسئلة لح تكون بخصوص البرنامج تبعك ليشوفوك انت فهمان شغلك ولا لأ

كتابة المشروع عليه 25% والشفهي عليه 25% التنين سوا 50% يعني نص العلامة

لحتى تنجح لازم تكون بالمجمل جمعت 60% من المجموع الكلي في حال جبت اقل من 30% بشي امتحان كتابي بهالحالة بتكون رسبت ولازم تعيد القسم اللي رسبت فيه بعد 6 شهور ازا جبت اقل من 50% بشي امتحان بس اكتر من تلاتين هالشي ممكن بس اذا تكرر لح يأثر على مجموعك الكلي ومتل ما ذكرت اقل من 60 بالمية كمجموع كلي بترسب

شوية نصائح شخصية بخصوص هالمجال:

اولا بالمدرسة شي وبالشغل شي ممكن يكون مختلف كلياً يعني لا تركز بس بالمدرسة وتهمل الشغل لانو بالنهاية هالحكي ما لح يفيدك المدرسة للشهادة والشغل لتأمن لنفسك وظيفة بسهولة والشكرات غالباً بتهتم بالخبرة اكتر من شهادة

البرمجة مو بصم مو شي بتحفظو وبيضل او لازم يضل معلق براسك البرمجة فهم والواحد بيتعلم اكتر من خلال التطبيقات اللي بساويها حتى لو تطبيقات تافهة وبسيطة

حاول ترتيب حياتك البرمجية يعني مثلاً اذا برمجت function ليحللك مشكلة معينة وانت بتعرف انو ممكن يلزمك بغير برنامج مستقبلا احفظو عندك لترجعلو بكل بساطة بعدين وتوفر عحالك تعب وجهد ووقت

اهم شي بالبرمجة هوة   Problem solving

مو مهم تحفظ بصم المهم انك تعرف كيف توصل للحلول وكيف تبحت بالنت وع شو تعتمد والجوجل وال stack overflow رح يكونو الاصدقاء المقربين الك بالبرمجة وللبحث عن حلول

كل لغة برمجة او Documentation او تقنية ممكن تستعملها بالبرمجة بيكون في الها موقع رسمي تلاقي فيه  framework  تبعها حاول تقرأها وتعتمد عليها ىلتشتغل صح طبعاً ما بيعطوك حلول جاهزة بس عالقليلة بنصير تفهم كيف اللغة او الفريم وورك بيشتغل

فيك تتعلم عن طريق اليوتيوب او عن طريق منصة udemy او عن طريق مواقع متل :

W3schools اوJavatpoints اوMDN

لا تفكر ابداً انك تقارن نفسك بغيرك وتقول لح كون احسن من فلان وفلان قارن نفسك بنفسك شوف الخطوات اللي عم تتقدم فيها يوم بعد يوم وكون فخور بهالتقدم حتى ولو بطئ نسبياً

لا تفوت المجال اذا تركيزك بس ع المصاري ولأنك سمعان انو معاشات المطورين عالية لانو صدقني لح تكون فاشل اذا دخلت لهالسبب لازم تحب الشي اللي عم تعملو لحتى تكون ناجح فيه ولتقبض المعاش اللي بتحلم فيه

المجال مو سهل ابداً بس كمان مو مستحيل

بالنهاية حابب وضح شغلة

انا مو فيلسوف ولا استاذ وحبيت بس اني اعطي فكرة عامه عن هالمجال حسب خبرتي المتواضعة فيه اللي عندو سؤال تاني بخصوص هالمجال يكتب وانشالله لح اقدر جاوب واللي دارس هالمجال وحابب يضيف نقطة اضافية للشي اللي ذكرتو او يصحح شي شافو غلط بحكي كمان بيكون مشكور

وبالتوفيق للجميع انشالله

Be the first to comment

Leave a Reply

Your email address will not be published.


*