شرح كامل طريقة التقديم للأوسبيلدونغ

الاوسبيلدونغ (Ausbildung)بألمانيا بيطلق عليه الألمان بإسم (Azubi) هو عبارة عن مهنة أو وظيفة بتتعلمها بالشركات أو المؤسسات أو مصنع وهي بتشبه مصطلح المعهد المتوسط أو الثانوية الصناعية بسوريا . بس الفرق بين الأوسبيلدونغ بألمانيا والمعاهد المتوسطة عنا هو فرق شاسع و ما في مقارنة ، لأنو الشخص عند خضوعو للتدريب المهني (الاوسببلدونغ) بقوم بالدراسة والشغل بنفس الوقت عملي ونظري بس وقت العمل هو أكتر من الدراسة بتكون 70% من فترة الاوسبيلدونغ بمكان الشغل و 30% مدرسة مهنة ( Berufsschule) وهاد الشي طبيعي لأنك عم تتعلم مهنة

#طريقة التقديم عكافة فروع الاوسبيلدونغ

كل شخص فينا بكون اختار المهنة يلي حابب يدرسها بس مو عرفان كيف يبدأ او من وين او شو لازم يعمل
مثلا انا قررت ادرس اوسبيلدونغ تجارة، وبعدين شو لازم ساوي؟؟؟
التقديم عالاوسبيلدونغ بيحتاج شغلتين مهمين جدا وممكن
هنن:

1-Unternehmen (الشركة او مكان العمل)
2 -Bewerbung (السيفي الشخصي)

يعني تجهيز السيفي واختيار مكان العمل

Unternehmen (مكان العمل):
____________________
الخطوة الأولى يلي لح بلش فيها هية اختيار مكان الاوسبيلدونغ تبعي مشان قدم عندون طلب
مثلا انا اخترت تجارة الكترونية كيف لازم بلش؟
اول شي بحدد شركات تجارة الالكترونية
و بقدم طلبي عالشركتين.
……….
مثلا حابة صير ممرضة
ساعتها بحدد اسماء المستشفيات يلي حابة اشتغل فيهون وبقدم طلبي عندون
مثلا حابة اعمل اوسبيلدونغ صيدلة
بحدد الصيدليات يلي حابة قدم عندون
وببعتلون طلب التقديم

Bewerbung (السيفي):
________________
هون بالمانيا اهم شي السيفي تبع الشخص وكل قبولك لح يتم بناءا عليه
ولازم تتعامل معو بعناية كبيرة وبيتكون من :
1- ملف الصورة او الغطاء:
Deckblatt
بتكون موجودة عليه صورتك واسمك واسم الاوسبيلدونغ يلي عم تقدم عليه وكاتب عليه المحتويات
ملاحظة هامة: الصورة ضروري جدا تساويها باستديو خاص
هون بالمانيا بكل الاستديوهات تبع التصوير في شي اسمو Bewerbungsfoto صورة السيفي ويفضل تاخدها على فلاشة بتكون اغلى شوي بس افضل (مشان التقديم اون لاين لح نشرح عنو بالبوست)
ملاحظة هامة: خلي فاتورة الصورة معك لان الجوب سنتر برجعلك تكلفتها يعني المصاري يلي يتدفعون بيرجعولك
___
2 – طلب التقديم:
Anschreiben
بتكتب فيه عدة امور مثلا انت بدك اوسبيلدونغ صيدلة واخترت صيدلية ساعتها بتكتب بطلب للتقديم ليش اخترت تكون صيدلي وليش بدك بالذات عند هي الصيدلية تتوظف
يعني باختصار بتكتب شوية معلومات عنك و بتمدح مكان العمل وضروري جدا تكون بتعرف معلومات عنو
وتكتب ليش انت مناسب للشركة وللمهنة
وضروري يكون مكتوب بدون اخطاء املائية
___
3 – السيرة الذاتية:
Lebenslauf
وفيها بتكتب كل شي معلومات عنك من وقت خلقت للحظة الحالية
1- رحلتك الدراسية مع التواريخ واسماء المدارس
2- نشاطاتك الاجتماعية يلي عملتا بحياتك مثلا اعمال تطوعية او هيك شي
3 – الشهادات يلي حصلت عليها
4- المهارات الشخصية مثلا بتحكي انكليزي او بتساوي مهن يدوية
5- الهوايات
وطبعا ايميلك ورقم تلفونك وعنوانك الحالي مشان اذا بدون يتواصلو معك
ملاحظة هامة جدا: خلي ايميلك باسمك الشخصي متل الاوسفايز تبعك
يعني مثلا اسمك كان مايا
لاتكتبي ايميلك
Roro@gamil…..
خليه باسمك
Rana@gmail….
وضروري يكون تصميم السيرة الذاتية حلو
فيه عدة برامج عالكمبيوتر فيك تصمم عليهون
وفي مواقع بتزل من عليها نماذج جاهزة
بتروح عكوكل وبتكتب
Lebenslauf World Vorlage
وفيك تحملهون مجاني
___
الشهادات:
Zertifikate
طبعا كل الشهادات يلي حاصل عليه
ان كان تاسع او بكلوريا او انكليزي او جامعية او اي شي
…………………….
طريقة التقديم :
في تلت طرق للتقديم
1 – عالانترنت (اونلاين):
بكون عن طريق البحث عن موقع الشركة اونلاين في جوجل والدخول ع الموقع
بعدين البحث عن Ausbildung frei stelle
والتقديم عليها
2 – عن طريق البوست: بتسأل على عنوان الشركة يلي بدك تدرس عندون وبتبعتلون وراقك بالبوست
3 – التقديم الشخصي: يعني بتحمل حالك وبتروح بتعطيهون وراقك.
_________
ملاحظات مهمة:
1-اهم شي انك تقدم طلبك لعدة شركات او اماكن لان في احتمال يرفضوك ببعض الشركات
يعني اقل شي بعات او بعتي طلبك لعشر اماكن
والافضل اكتر
وفي حال اجاك/ي قبول اكتر من مكان ساعتها انت بتختار انو الافضل
2 – لا تزعل اذا اجاك /ي رفض لان هاد كتير بصير حتى مع الالمان يعني الواحد مالازم يفقد الامل لازم يضل يحاول
3 – لاتكذب بالمعلومات يلي عم تكتبها بطلب التقديم لان وقت يعملولك مقابلة لح يسئلوك عكل شغلة كاتبها بالسيفي تبعك
________
في حال اجاك قبول مبدئي
Zusage الأسم باللغة الالمانية
هناك عدة احتمالات بتكون للخطوة التالية ويلي هنن :
1 – مقابلة شخصية
بيعطوك موعد وبتروح لعندون وبيحكو معك وبيسألوك عن معلوماتك وبيتعرفو عليك
والافضل بهي الحالة انك تروح بلباس رسمي
نسبة الحصول عالاوسبيلدونغ بهي المقابلة 90%

2 – مقابلة مع فحص
Assessment Center الاسم باللغة الالمانية
هون بيعطوك موعد لتجي تعمل فحص ومقابلة شخصية بنفس الوقت
بيعملولك فحص باللغة الالمانية طبعا وبيتضمن معلومات عامة ورياضيات
وايضا بيتضمن مقابلة شخصية
نسبة الحصول عالاوسبيلدونغ هية 50% لان مابتكون لحالك يعني بهي الحالة بتكونو كذا شخص من المتقدمين يلي ختاروكون

3 – مقابلة عالهاتف
ساعتها بيتصلو فيك وبيسألوك عبعض المعلومات
ونسبة القبول بتكون 30%
_______________________________
واذا لقيت حدا الماني يساعدك بكتابة Bewerbung بكون منيح مشان ماتعمل اخطاء املائية