Fachinformatiker Systemintegration تجربة طالب تقني معلوماتية

أوسبيلدونغ Fachinformatiker Systemintegration
تقني معلوماتية “اندماج أو تكامل أنظمة” :

بالبداية أنا دارس 3 سنين هندسة نظم معلوماتية بسوريا ومشتغل بالمجال وعندي خبرة بالهاردوير كتير كبيرة .

قبل انهائي دورة الـ B1 بلشت ادور شو الامكانيات لكمل بالمستقبل إنو كمل دراسة بالجامعة أو أعمل أوسبيلدونغ “خاصة إنو ماكنا منعرف شو هذا الأوسبيلدونغ ” .

بالبداية حصلت على مكان لأعمل ” السنة التطوعية ” عند البلدية للعمل مع اللاجئين وعن طريق عملي احتكيت بكل الجهات المعنية بالعمل مع اللاجئين والجهات الاستشارية وتعرفت على كتير اشخاص فسألت وفهمت بشكل جيد كتير الفروقات والاحتمالات اللي ممكنة بأواسط سنة 2016 بتعلن بلدية اللي انا فيها انو بدهم يعملو برنامج يستوعبو عدد من اللاجئين ويساعدوهم على الدخول إلى سوق العمل .
بحكم عملي ضمن البلدية قدرت اتواصل بشكل مباشر مع قسم المعلوماتية بالبلدية وبالبداية ماكانوا على اساس يشتركو ضمن هالبرنامج بس الشيف المسؤول عني رتبلي موعد مع المسؤول عن القسم ودعوني لعندهم على القسم وحكيو معي “بعدين بعرف-بعد سنة من المقابلة ” إنو كان هدف هي المقابلة كانوا يشوفو شخصيتي لآنو كان عندهم تجربة سابقة سيئة مع متدرب سوري .

بالنهاية بتقدم للمشروع للحصول على مكان كان في 8 اشخاص غيري متقدمين لتقني المعلوماتية وبصراحة قطعت أملي “لآنو في منهم معهم C1 ومخلصين الجامعة بسوريا بس مع ذلك تقدمت وبعدين حددولنا مقابلة شخصية وعلى اساسها كان رح يتم الاختيار .
زملائي بعملي كـ متطوع قالولي بس كون طبيعي وجاوب عن الأسئلة بتلقائيتك .

بإيميل الدعوة بيكون في امكانية يجي معك شخص بشرط مايشارك بس بيقعد وراك ليحضر ويشوف وهذا اللي صار ,وفعلاً فتت على المقابلة ورافقتني أمرأة المانية كانت هيي اللي ساعدتني بكتابة طلب التقديم الـ Bewerbung المقابلة كانت بقاعة كبيرة وامامي 12 شخص إضافة لرئيسة الموارد البشرية ومن ضمنهم شخصين من قسم المعلوماتية بالبلدية .
بالبداية بتخبرني رئيسة الموارد البشرية اللي هيي رح تدير المقابلة إنو بيفضلو انو احكي بالالماني بس ماعندهم مشكلة اذا حكيت بالانكليزي وكان هالشي عامل كتير ريحني مع العلم ما استخدمت الانكليزي غير منشان كلمة وحدة ماعرفت معناها بالالماني .

اسئلة المقابلة كانت كتيرة ومن حدا كتير محترف بالتوظيف بس كان في عدة اسئلة موجهة بشكل خاص لآنو سوريين :
شو رأيك بالديموقراطية ؟ وشو بتعنيلك ؟
جاوبتهم انو اللي بعرفه عن الديموقراطية إنو لو كانت موجودة ببلدي ماكنت خسرت سنتين من حياتي بالسجن .
شو موقفك إذا كان رئيسك بالعمل إمرأة ؟وهل عندك مشكلة بالموضوع ؟
انا جاوبتهم انا رح اجاوبكم بس عندي سؤال متأكدين إنو هالسؤال عادي تسألوه !! -اللي اكتشفته بعدين انو فعلاً السؤال يعتبر نوع من التمييز ولايجوز انو ينسأل-
وجاوبتهم إنو حالياً من 7 شهور عندي بعملي الحالي مع البلدية شيف هي أمرأة وماكان عندي مشكلة بالموضوع ولارح يكون .
بيسألوني عندك مشكلة إنو بالسنة التحضرية مارح ندفع كتير ؟
جاوبتهم إنو بعرف إنو مابتدفعو كتير ليككم انا عم بشتغل متطوع عندكم من 7 شهور وماعم تدفعولي كتير . بس حكيتها بطريقة ضحكتهم كلهم “بصراحة مابعرف ليش “
بالأخير السؤالين من الشخصين اللي من قسم المعلوماتية واحد كنت بعرفه من قبل والتاني كانت صبية هيي اللي المسؤولة عن تدريب طلاب الأوسبيلدونغ حاصرتني بعدة اسئلة عن شو توقعاتي بالشغل وشو متوقع إنو اعمل وشو بيتوجب عليي .

بالمقابلة اكتر من مرة خليت الكل يضحك من تعليقي على اسألتهم .

انتهت المقابلة وخبرتني المرأة الألمانية إنو كان ادائي فيها رائع “مع العلم كنت حاسس حالي مخبص تخبيص مابعده تخبيص “.

بعد اسبوع بيوصلني ايميل إنو تم قبولي وبيطلبو مني إحكي مع الجوب سنتر لحتى يتم ترتيب الاجراءات الادارية لآنو أول سنة رح تكون سنة تحضيرية وبعدها 3 سنين أوسبيلدونغ .
السنة التحضيرية مسؤل عني بالدرجة الأولى الجوب سنتر . والراتب اللي باخده من البلدية كان حوالي 220 يورو مع دوام 6 ساعات بدون كورس لغة و 4 ساعات مع كورس اللغة عملت بهي الفترة كورس B2 وما اخدته بس كانت لغتي تحسنت بشكل كتير كبير بسبب عملي اليومي .
العمل اثناء السنة التحضيرية كان مفيد بشكل هائل تعلمت اسماء كل شي ونظام العمل والهيكل التنظيمي ضمن البلدية ونوعية الواجبات المترتبة علينا وجو العمل مع واجبات قليلة وشوي شوي صارو يزودولي واجباتي وخاصة بعد إنهاء كورس اللغة صرت اطلع بشكل دائم على مهمات لوحدي بدون اي حدا معي وصرت مختص بالطابعات وانا بشتغل عند البلدية يعني طابعات بأعداد هائلة ,إضافة إلى إنو الطابعات مكروهة بالمجمل من مختصي المعلوماتية لآنو اعطالها غبية ومعقدة احياناً لآنو فيها اجزاء ميكانيكية واجزاء برمجية وتركيزي على الطابعات لآنو شفت البقية بيكرهوها فهيك اخدت عمل البقية مابيحبوه واضافة انو هالشي عملي شعبية ضمن البلدية حتى صار من اجمالي 1800 موظف على الأقل الف منهم بيعرفوني بشكل شخصي بسبب مشاكل الطابعات الدائمة ويومياً مضطر افتل بأبنية البلدية اصلح الطابعات او اركب الجديد .

الأوسبيلدونغ :

عند نهاية السنة التحضيرية عطوني شهادة تقييم وبلشنا بالأوسبيلدونغ بشكل رسمي بالأول من شهر آب بالجانب العملي ما تغيير عليي شيء بالعكس كنت مبسوط إنو ماني محتاج تعليم بأي شي في شبين ألمان جداد قبلوهم يعملو أوسبيلدونغ معنا بنفس الاختصاص وهني معي بالسنة الأولى فأنا كنت دائماً متفوق عليهم معرفياً بسبب السنة التحضيرية .

الجزء الصعب هوي المدرسة لعدة اسباب أهمها : اللغة – وانا عمري 30 سنة ومعظم الطلاب عمرهم تقريبا بحدود العشرين ومعنا بصفنا طالبين 16 سنة – اضافة إلى إنو انا كنت طالب هندسة وتقرريبا كنت مخلص نص الطريق للتخرج وهلق انا بالـ Berufsschule لاقيتها صعبة أول اسبوع .
بعدين كل الأمور مشييت تمام
بالمدرسة في هي الأنكليزي – اساسيات المعلوماتية والشبكات – التطوير البرمجي – والسياسة وقانون العمل – إضافة للاقتصاد
بالنسبة للانكليزي فأنا متمكن فيها فماعندي مشكلة واساسا اللي بيركزوا عليه هيي الكلمات اللي مستخدمة ضمن الشركات .

اساسيات المعلوماتية والشبكات : انظمة العد الثنائي والست عشرية والدارات المنطقة بالنسبة إلى أنا دارسها وسهلة كتير بالنسبة إلى بس باقي الطلاب عم يعانو فيها لآنو كمية المعلومات اللي عم يعطوها بالجلسة كتير كبيرة وكان اطرف موقف إنو لما قمت بحساب ذهني لجمع رقمين بالنظام الثنائي واعطيت الجواب خلال ثواني الكل طلع عليي باستغراب مافي غير الاستاذ فهم شو عملت .
بشهر تشرين أول – اكتوبر رح نبلش بدورة بأساسيات الشبكات والـ سيسكو ورح يكون توجه هذه المادة بهذا الاتجاه .
التطوير البرمجي هيي مادة اساسيات برمجة مابيعلمونا لغة برمجة محددة لآنو بالفحص الأخير مافي لغة برمجة محددة ليتم استخدامها بس بيخلونا نتعلم كيف بيفكر المبرمج “من جهتي ماعندي مشكلة كمان لآنو دارس 3 مواد برمجة بسوريا ”

السياسة وقانون العمل : المادة بالنسبة إلى صعبة بسبب كمية الكلمات الجديدة الاختصاصية اللي مابعرفها , بس المادة كتير سهلة والمعلومات اللي فيها كتير كتير مهمة إلك إذا بدك تعيش وتشتغل بألمانيا لآنو كله عن حقوقك القانوني وواجباتك وعن قانون العمل وتفاصيله .

الاقتصاد : اللي عم يدرسونا ياه بالغالب هوي مادة إدارة اعمال وفهم تركيب وبنية الشركات واساسيات العمل الإداري الغرض من هذه المادة إنو الشخص يفهم شو الية اتخاذ القرار بالشركات وكيفية ادارتها.

بالنسبة لبيئة العمل فهيي كتير رائعة زملائي بالعمل رائعين جداً وانا على وفاق كتير كبير معهم والعمل معهم ممتع جداً وخاصة لما الواحد بيتعلم واجباته وحقوقه وبيقوم بواجباته بشكل دائم بشكل دقيق وانا قدرت احصل على هذه السمعة وهالشي بيخليني انو اذا انطلبت مني مهمة اضافية بكل بساطة بوضح إنو انا هذا مو واجبي وماني مضطر اعملها بس انا رح اساعد بكل طيب خاطر .
عملت لنفسي وضع خاص ومميز وعلاقة مميزة مع الجميع وانا الوحيد اللي بيشرب متة ضمن الشغل بينما البقية بيعملو قهوة .
وجبت معي أكل سوري اكتر من مرة وكتير كان لاقوا الموضوع رائع , ودائماً مشارك بنشاطات الفريق اللي بعد العمل اللي بتصير ودائما عم بتعلم شي جديد عن ثقافة البلد أو لغوياً .
اذا بدك تبقي نفسك بقوقعة انا الاجنبي الغريب رح تضل عطول واذا كنت منفتح وعم تحاول غالباً رح تلاقي اشخاص حواليك يدعموك .
اهم شي تكون لطيف وتعرف توصل فكرتك بلطافة ووضوح .
اللغة بالبداية ماكانت امر اساسي لآنو هني عرفانين إنو آخدين شب لاجئ وانو اللغة مع الشخص المثابر بتجي مع الوقت وفعلياً هذا اللي صار .
بالبداية كان بالنسبة إلي إنو دق تلفون لآحكي مع موظف واتأكد انو هوي بمكتبه واروح افحص العطل عنده كان بالنسبة إلي تعذيب , حالياً صار الأمر كتير تقليدي وبسيط جدا بس كل شي بيجي بالتدريب والتكرار .

امر كتير مهم إنك تفهم روح الفريق وانو العمل هوي عمل فريق ولازم الفريق يساعد بعضه .

في شي ضمن بيئة العمل انو مافي شي بيتخبى , يعني كله بيحكي لبعضه الكل بيحكي للتاني كل شي يعني خربطت الكل رح يعرف انك خربطت وعملت شي مليح الكل رح يعرف .
الفكرة مو طق البراغي اللي منعرفه الفكرة أنو بأمر الشغل مافي مراعاة لآي شي وبدك تتعلم هذا الشيء وتتقنه منشان ماتنحط بمواقف قاسية او محرجة .

بالنسبة للراتب صافي عم اقبض 748 يورو – وكامل 918 يورو . للسنة الأولى . وكل سنة بيزيد .

من جهتي انا عم بشتغل مع الحكومة وبعد التخرج اذا كان في امكانية يخلوك فـرواتب الحكومة عالية وإلهم امتيازات جيدة جداً .