المهنة 11 الملاحة الداخلية Binnenschiffer

نعرض اليكم بعد اراء طلابنا السوريين المشاركين في التدريب المهني للمهن
سيكون هنالك سلسلة للمهن حسب آراء السوريين
#من_خبراتنا
المهنة رقم 11 Binnenschiffer/in

السلام عليكم و رحمة الله و بركاته
الله يعطيكون العافة على ها الصفحه الكريمة و ان شاء الله بتمشوا بدرب التيسير و النجاح على طول,حابب اليوم شاركون قصتي في المانيا
متل ها الايام بسنة 2016 كان معي شهادة b1 وقررت سجل اوسبيلدونغ و الحمدلله كانوا شهاداتي معدلين و مجهز كل الاوراق المطلوبة متل السيرة الذاتية وشهادتي المعدله وشهادتي الاصلية المترجمة واوراق الاقامة وبلشت راسل الجامعات وراسل الشركات بمناطق مختلفة بالمانيا تقريبا بعتت شي 35 طلب.
الدراسة كانت :
Binnenschiffer/in
مدتها 3 سنوات و فيها بيتعلم الشخص كيف يكون مؤهل لقيادة البواخر والسفن في الانهار ,طبعا الدراسة بتشتمل على نظري و عملي .
الجزء العملي بتكون ع الباخرة لمدة شهر ووممكن توصل لشهرين بتشتغل فيه باعمال متل الحف و البردخه و التنظيف و التشحيم و الرباط من والى الرصيف والقنوات المائية الى جانب فن التواصل مع السفن الاخرى و الموانئ ,بطبيعة الشغل انا شفتها حلوة و جذابة لاني كل يوم بتكون بمنطقة جديدة و بتشوف ناس جدد ومدن جديدة بالاتحاد الاوربي,وبعتبرها صعبة لان الشغل بيبلش من الساعة 05:30 صباحا حتى الساعة 10:00 مساءا واغلب الاوقات بكون الشغل متعب جسديا الى جانب اوقات النوم القليلة,
بعد فترة الشغل بيعطوك شهر بتقعد فيه بالبيت طبعا مدفوع الراتب و الضرايب و التامين الصحي والفترة بتزيد و بتنقص حسب اوقات الشغل و حسب ضرورات بتحددها الشركة ,طبعا الكل رح يقول منيح اذا اشتغلت اكتر بيعطوك اجار ساعات اضافية ,بس للاسف ما هيك بتصير الامور العقد بنص على اني لازم اشتغل يوميا 8 ساعات ونظام الشغل بيكون ك الاتي :

استيقاظ 05:30 , فك رباط السفينة والتاكد من جاهزية السفينة للابحار بتستغرق حوالي 45 دقيقة.
الفطور بين 06:00 و 08:00 ما بصير تنام بها الوقت 😣
بداية الشغل 08:00
فترة استراحة او اكل من 12:00_13:00 او 13:00_14:00
فترة شغل حتى الساعة 18:00 هيك بكون الشغل خلص مع البقاء في وضع التاهب لان كل نص ساعة في شي اسمو schleuse ولازم تكون متواجد للقيام بمهمتك على اكمل وجه بغض النظر انت بفترة راحة او اكل او خارج اوقات العمل الرسمي ,طالما الباخرة عم تبحر لازم تكون جاهز باي لحظة .
وقت انزال المرساة عادة الساعة 22:00 وقتها بكون وقتك الشخصي الي انت حر شو تعمل فيه 😣 اذا كنت بمدينة جديدة ممكن تتفسح تروح و تجي بشرط اني ترجع قبل موعد الابحار ,او ممكن تاكل وتنام ببساطة 😣 .
وهون برجع بقول منشان الوقت الاضافي طالما انت عم تعمل اوسبيلدونغ كل 24 ساعة شغل اضافي بتتقاضى عليها يوم عطلة زيادة وساعات العمل من 08:00 حتى 18:00 وساعات العمل الاضافية بتكون بعد الساعة 22:00 لا من المتوقع منك انك تكون موجود للقيام باعمالك خلال الفترة بين 06:00 حتى 22:00 .

اكيد الكل رح يسال :
الاكل والشرب على حساب مين؟ على حسابك الشخصي اكيد
شو منشان الدخان؟ الحمدللة انا مو مدخن و اللي بدخن لازم يدخن ع حسابو
شغلة مهمة :صحي هو شغل او شهرين وبعدين شغل راحة بالبيت بس لاننسى انو خلال السنة لازم تزور المدرسة حتى تتعلم النظري وهيك رح يكون جدولك بالستة كالاتي:
12شهر ناقص 4شهور نظري =8 شهور خلال ها ال8 شهور 4 شغل و 4 بالبيت او ممكن 5 شغل و 3 بالبيت .
لهيك لا حدا يقول 6 شهور شغل و6 شهور بالبيت.

راي الشخصي بالمهنة :
المهنة متل ما اشرحتلكون مهنة حلوة بالسفر و بجوها وانك وقت تخلص الاوسبيلدونغ بتلاقي رواتب عالية قدامك من 2200 يورو وانت طالع,كمان في فترة راحة شهر بالبيت,سلبيات انا شفتها اوقات الشغل شوي صعبة,والنسبة للانسان اللي عم يدور ع الاستقرار وانو يكون اسرة رح يواجة صعوبات بالمستقبل.

هادي كانت تجربتي بالاوسبيلدونغ ل كل اللي حابب يعرف اكتر عن ها المهنة هي رابط :
https://www.ausbildung.de/berufe/binnenschiffer/
لا تنسى ان تراسل شركات كتيرة من شان زيادة الفرص و القبول بيتعلق فيك و مستوى تعليمك وبقدرتك على ان تحاور اللي قدامك.
لهيك اي شخص بقول اني التسجيل بالاوسبيلدونغ بيحتاج b2انا بقلوا ها الحكي مو صحيح واي شخص متكلم و بيفهم قادر اني يسجل بمجرد قدرتو على المحاورة و المناقشة خلال القابلة .
موفقين جميعا بحياتكن و ان شاء الله درب النجاح و السعادة للجميع .