المهنة 19 Restauranfachamnn خبير مطاعم

تجربة طالب في اختصاص
Restauranfachamnn
خبير مطاعم

أنا متابع قديم لصفحتكن وبقرأ مقالاتكن وبشجعكن كتير على المواصلة، المشكلة انو انا ساكن بالنمسا لهيك احيانا بضطر افتح ع النت بعد ما اقرأ مقالاتكن لاتأكد انو الكلام بيتطبق ع النمسا ولا لا.
ماعلينا، حابب احكيلكن تجربتي مع الأوسبيلدونغ وشارككن فرحتي يلي مابتنوصف.. أنا اجيت بشهر تموز من 2015 ع النمسا، وسكنت بتيرول وهالمنطقة كتير بتطول فيها الاقامة لتطلع والضيعة يلي كنت ساكن فيها ماكان فيها شي ينعمل ابدا، أول 6 شهور مضوا ماعملت فيهن شي بيتعلق باللغة وكانت ألمانيتي صفر وهون مو مسحلنا نبدى بكورس اللغة قبل الاقامة، مرة كنت عند الجارة وحكتلي انو تيرول منطقة سياحية والعمال مطلوبين بشكل كبير للفنادق والمطاعم وبيسمحولك تعمل اوسبيلدونغ بهالمجال حتى بدون اقامة.. ماكذبت خبر وابتديت ب Restauranfachamnn
ومشيت اموري وبلشت اعتمد ع اليوتيوب بتعلم اللغة، اشتغلت اول 7 شهور وبعدين قالولي صار وقت تروح ع المدرسة (بالنمسا الواحد بروح ع المدرسة شهرين متواصلين كل سنة)، اجتزت السنة الاولى بعلامات كانت بعيوني كتير منيحة على اعتبار انو لغتي مو كتير قوية ووالله شهرين كاملين مادوق فيهن طعم النوم.
ومن اسبوع خلصت سنتي التانية والحمد لله طلعت بعلامات خلتني كون التالت ع الصف من بين الطلاب. طبعا هاد الفرق بين السنتين كان سببو المثابرة والتحضير الكبير للمدرسة وترجمة كتبها قبل مابلشت السنة التانية وطبعا التحسن باللغة.
حبيت شارككن هالشي اللي صار معي لأنو فرحتي مابتنوصف بالنتائج يلي حسيت اني بستاهلها، ورح اكتبلكن رأيي عن هالاوسبيلدونغ بشكل عام.
هلأ بالنسبة لهالاوسبيلدونغ رأيي حيكون مبني على المنطقة اللي انا ساكن فيها ومعتمدة ع السياحة بشكل كبير كتير..
من ناحية: اذا كنت قاعد بالبيت وحابب تبلش شي شو ماكان يكون بس كرمال تبلش ف هاد الاوسبيلدونغ الك، اذا حابب تاخد وتعطي مع الناس وتتعرف على عالم من جميع دول العالم ومهتم بثقافاتهن وعاداتهن ف هاد الاوسبيلدونغ الك، اذا بتهتم باللغات وحابب تتعلم لغات اكتر من عدد اصابع ايدك ف بتقدر على سبيل المثال تنهي الاوسبيلدونغ وتشتغل سنة بكل دولة وبتصير بلبل باللغة.
وببساطة يلي بحس حالو حابب هالمجال لا يوقف ابدا.
من ناحية تانية: هاد العمل واحد من الاعمال الغير مرغوبة بالوسط النمساوي والالماني لأنو اوقات العمل من ماتتناسب مع اوقات تواجد العائلة بالبيت، عدا عن انو الشغل فيه ضغط كبير وبدو مين يكون قدو، ببساطة انت عم تشتغل عند مالك الفندق وواهب نفسك الو وانتوا اتنين ساعتها بتنظموا برامج حياتكن ع بعضها.
أنا قررت اعمل هالاوسبيلدونغ لأنو ماكان في شي غيرو بينعمل ومشان حسن لغتي وما ضل سنتين عم روح ع كورسات اللغة، بس بعدين اكتشفت انو هالمهنة كتر منيحة لطلاب الجامعات لأنو بيقدروا يشتغلوا دوام جزئي او بعطلة الاسبوع او بالليل مثلا وأنا ناوي خلص وبلش دراسة ان شا الله.
وبس هيك حبيت شارككن تجربتي مع هالمهنة، وشكرا

صورة عن علامات السنة الثانية