تجربة طالب لمهنة Bauzeichner

السلام عليكم ورحمة الله وبركاته.

حابب احكي عن تجربتي بآوسبيلدونج Bauzeichner( Statiker und Bauingenieur) طبعاً و اولا هاد الاختصاص بيحتاج لغة منيحة و معلومات بتخص الرياضيات و الفيزياء و ان شاء الله الشرح يكون كافي و وافي..

البدايه بدك تحاول تلاقي مقعد اوسبيلدونج او براكتيكوم او EQ بمكتب تصميم او شركة بناء واذا عندك معارف عرب او المان ممكن يساعدوك لا تخجل واسعى ورا رغبتك بأي وسيله و هون الشغله بدها صبر وقد مافيك تبعت طلابات توظيف ابعت عشان تكبر فرصتك تلاقي مقعد.

اول مراحل القبول انك تتلقى موعد مقابله شخصيه ( Vorstellungsgespräch) وهاد اهم حتى من البركتيكوم بحد ذاتو و خاصة النا الي الالمانيه مو لغتنا الام وهون لازم تحاول تقنع صاحب العمل بكل الوسائل و بطريقه لبقه انو هالمقعد وهالاوسبيلدونج هو حلمك وانو رح تسعى بكل الوسائل تحصل عليه و طبعاً بدون تصنع او لف و دوران وتحاول تحكي بلغة قواعديه قد ما حسنت..

اذا الله كتبلك الموافقه رح يطلب صاحب الشغل انك تعمل براكتيكوم وهون و بدون تردد لازم تقبل و ما تسأل عن شي اسمو مصاري و راتب لانو هاد السؤال سلبي و بيأثر عليك.. وهون لازم تكون فتح و تحاول قدر المستطاع تستوعب و تتقبل الافكار و تعطي انطباع منيح عنك بفترة البركتيكوم.. بنجي لمرحلة القبول و المدرسه.. بعد القبول و توقيع العقد و بالنسبة لاختصاص Bauzeichner بشكل عام بتكون فتره الاوسبيلدونج بأغلب المقاطعات ٣ سنوات و اول سنه بتكون كلها مدرسه و ال Bauzeichner عباره عن ٣ فروع.. 1- Bauzeichner Architektur 2- bauzeichner Statiker und Ingenieurbau 3- Tief-und Straßenbau. طبعاً حسب المكتب او شركة البناء .. ومتل ما قلت اول سنه كلها مدرسه و عندك مواد بتتعلق بالتصميم و الرسم سواء على برنامج تصميم CAD او رسم باليد و مواد بتتعلق الرياضيات و اللغه الالمانيه والانجليزي و مادة اسمها Wirtschaftskunde بتتعلق بقوانين العمل و الاوسبيلدونج و العائلة و… و.. الخ ومادة اسمها Geschichte und Gemeinschaftskunde بتتعلق بالقوانين و التاريخ الالماني و.. و… و.. مادة ديانه مسيحية كاثوليك وهي فيك تلغيها بس بحال لغيتها لازم تحضر هالساعه الدراسيه بغير صف.. الصعوبه ببعض المواد النظريه لاني كلها صف حكي و قوانين و تاريخ و قصص و المواد المتعلقه بالرياضيات لازم يكون عندك معرفه و بهالاختصاص في كتاب اسمو Tabellenbuch فيو كلشي بيتعلق بالرياضيات وهاد فيك تستعملو حتى بالامتحانات.. بالنسبه الي انا عامل من سنه ونص كورس B2 Beruf و الحمد لله لغتي منيحة كتيرة بس رغم هيك ما بنفي الصعوبه و خاصه بالمواد النظريه لاني في كتير مصطلحات لغويه و مصطلحات رياضيه و لغة قانون يعني بدها هز كتاف و هلق صار بكل المدارس المهنيه او بمكتب العمل شي اسمو Nachhilfe فيك تقوي لغتك و يساعدوك بالشي الي شايف حالك ضعيف فيو..

بالشغل اذا كان الشيف حباب و ابن حلال ما بيضغط عليك لاني بيعرف انو اللغه مشكله و بيساعدك باي سؤال.. بنجي على شغلتي.. Bauzeichner Statiker und Bauingenieur هالفرع منيح لاني بيتطلب الرسم الهندسي و دراسه البناء و مطلبات الدعم يعني مثال بتشوف هالبناء قدي بيتطلب دعم وقدي لازم يكون سمك وعمق الأساس وشو نوع البيتون الي لازم نستخدمو و شو نوع حجر الحيطان و نوع الحديد و قدي لازم يكون سمك السقوف تبعو و وين نقاط الضعف بالسقف وبهالنقاط شو قطر قضيب الحديد… و.. و… و…الخ الايجابيات.. دوام مكتبي مريح و للمستقبل وخاصه للي ناوي يرجع عسوريا هالمجال كتير منيح و هون بالمانيا وحاليا هالاختصاص مطلوب.. السلبيات.. بدك لغه منيحة كتير و تتعب على حالك و دراسه يوميه و خاصة للمصطلحات طبعاً هالشي مو سلبي بس البعض للأسف بس شاف هالكم من المعلومات بيترك و بيمشي.. الراتب ضمن الاوسبيلدونج بيختلف من شركة لشركة ومن ولايه ل ولايه و اذا كان مكتب تصميم او شركة بناء لاني في اصدقائي البعض بياخد ٦٥٠ صافي و بعض بياخد ٨٠٠ صافي بعد التأمينات.. والراتب بعد الاوسبيلدونج نفس الشي بس بيكون بين 2300 – 2800 يورو قبل الضرائب.. و متل ما قلت سابقا شركة البناء بالنسبه للراتب افضل من مكاتب التصميم..

عسى اكون شرحت بشكل كافي و الي حابب يستفسر اكتر انا موجود بالخدمه وعسى نكون عملنا خير لوجه الله..