تجربة طالب في اختصاص Kaufmann für Dialogmarketing

السلام عليكم ورحمة الله وبركاته اسمي شيار وعم ساوي اوسبيلدونغ Kaufmann für Dialogmarketing سنة تانية وبنفس الوقت عم ساوي فايتر بيلدونغ اسمو Betriebswirt. انا بلشت الاوسبيلدونغ عن طريق وحدة المانية كانت تشتغل هونيك وهي اللي عرفتني عالشركة طلبوا مني بوقتها شهادة c1 وصف عاشر وانا معي بكالوريا ادبي المهم مشي الحال . الشغل عبارة عن مركز اتصالات وشغلنا كلو عالتلفون وتواصل مع الاقسام التانية او مع الزباين لهيك بيطلبوا مستوى لغة عالي، الشغل فيو خصوصية ومريح لدرجة كبيرة ومناسب حتى للمحجبات لانو متل ماقلت التواصل مع الزباين كلو عالتلفون. المواد الاساسية للفحص النهائي للاوسبيلدونغ هنن Projektmanagement, Wirt-Sozialschaft , Kommunikationsprozesse. وماتبقى هنن مواد ثانوية متل رياضة وانكليزي الخ . وهدول المواد رح ندرسهون خلال ٣ سنوات. الشغل ٣ ايام بالاسبوع ويومين بالمدرسة بشكل اسبوعي حسب نظام المدرسة الموجودة بكولن. بعد مابلشت الاوسبيلدونغ ب ٦ اشهر عرضوا علينا بالمدرسة انو نساوي كمان فايتربيلدونغ بنفس الوقت وانا عجبتني الفكرة ف قدمت امتحان القبول اللي كان عبارة عن رياضيات وانكليزي وثقافة عامة وكان سهل ف انقبلت وهلق انا بالفصل الثالث وهو عبارة عن سبع فصول كاملة والشهادة بالاخير تعادل الباتشلور وعنا بالمدرسة في اختصاص وحيد اللي هو Marketing يعني تسويق وهاد هو اللي انا عم ادرسو. الدوام عبارة عن اول سنة يوم واحد بالاسبوع وكل اسبوعين في يوم سبت وبالسنة التانية والتالثة يومين بالاسبوع وكل اسبوعين سبت والدوام بيكون بالمسا لانو خلال اليوم بيطون الواحد اما بالمدرسة او بالشغل. القصة مو مستحيلة ولكن صعبة وبدها دراسة المواد الاساسية للفحص المهائي هننMarketing, BWL,Rechnungswesen,Personal. وطبعا في مواد ثانوية خلال سنوات الدراسة مثل رياضيات وقانون وانكليزي الخ. سلبيات المهنة هو انو الدوام نظام ورديات بيبلش ال٦ الصبح وبينتهي الساعة ١١ المسا، والايجابيات شغل مريح جدا لكل شخص طاولة وكومبيوتر وعم يشتغل يعني في استقلالية، ع فكرة حتى الاشخاص المعاقين اعاقة جزئية بيشتغلوا معنا بالشركة. بالنسبة للراتب اول سنة ٧٠٠ تاني سنة ٨٠٠ تالت سنة ٨٥٠ تقريبا وهالشي بيختلف من شركة لشركة وبعد التخرج ١٨٠٠ – ٢٣٠٠ بروتو. نصيحتي لكل شخص بشكل عام حاول تساوي اوسبيلدونغ لانو سند للضهر وبس تخلص ماعجبك ممكن تساوي Umschulung ونصيحة بشكل خاص لهالفرع فرع ممتع ودراستو سهلة ك اوسبيلدونغ واذا حب الواحد يطور حالو دائما في فرص وفي مجال لهالشي. التقديم للاوسبيلدونغ مافي اسهل منو اكتب بغوغل اسم الاوسبيلدونغ ورح تلاقي كل الشركات اللي عندون مقاعد اوسبيلدونغ المهم لاتيأس وابعت قد مابتقدر Bewerbung حتى تضمن مقعد. بتمنى كون وضحت بالقدر المطلوب واذا في اي سؤال اكتبوا بالتعليقات وانا رح رد عليكم باقرب وقت حسب الفضى لانو العيلة والولاد كمان الهم حق عليي هههههههه. والسلام عليكم ورحمة الله وبركاته