تجربة طالب في اختصاص Fachinformatiker/Anwendungsentwicklung

فيما يلي نقدم لكم تجربة طالب سوري في الاوسبيلدونغ لإختصاص Fachinformatiker/Anwendungsentwicklung
#من_خبراتنا

مرحبا ويعطيكم العافية.
اناحابب احكي تجربتي بالاوسبيلدونغ.
انا كنت دارس آثار بسورية ومو مخلص، هون قررت اعمل اوسبيلدونغ بفرع المعلوماتية قسم تطوير البرمجيات Fachinformatiker/Anwendungsentwicklung المهم خلصت B1 وقبل ما بلش B2 وعن طريق بعض المتطوعين الألمان حسنت دبر Praktikum بشركة برمجيات، عملت براكتيكوم تقريبا شهر، كتير كان مهم انو بفترة البراكتيكوم ورجي الشركة أني جاد وحابب الفرع وحابب اتعلم، واني متحفز.
مع انو ماعندي أي خبرة سابقة بمجال البرمجة عرضت الشركة عليي من حالها انو اعمل اوسبيلدونغ عندهم (كنت مفكر انو مستحيل ياخدوني ويفضلوني عن اي متقدم ألماني، خاصة ماعندي اي خبرة ولغتي لساتها مو كتير منيحة) بس صدقوني الموضوع مالو علاقة، ارباب العمل هون أذكياء ما بهمهم بس انت هلق شو، بهمهم اكتر شي يشوفو مدى جديتك ومدى تحفيزك وبس لانو الخبرك واللغة معها معها بتجي بس اذا مافي جدية وتحفيز وحتى لو معك لغة وخبرك فأنت غير مرغوب فيك.
طبعا هالمجال بدو انكليزي بمستوى جيد او مقبول، الشركة مادققو عالألماني كتير حتى ما طلبو أي شهادة لغة او بكالوريا (يمكن لانو كنت واضح معهم بالمقابلة وورجيتهم انو انا كنت موظف بشركات اتصالات بسورية والعراق بس مو أقسام تقنية)
بعد البراكتيكوم عملت كورس لغة B2 وبعد الكورس بلشت الاوسبيلدونغ. بلشت اول الشي بالشركة (نظام بلوك. اسبوعين بالشركة واسبوع بالمدرسة) بالشركة بما انو ماعندي اي خبرة فجابلولي كتاب مشان بلش فيو، غير هيك تميت اول اسبوعين لحالي عبتعلم لغة البرمجة #C من النت (متل ما طلبو مني)
بالمدرسة كنت كتير خايف انو المواد تكون صعبة وبدها رياضيات، طلع ولا أسهل، يعني بدرس الشبكات مثلا بلشو يعلمونا مما تتألف الدورة الكهربائية البسيطة (تبع الصف السادس مصباح وبطارية وسلك وقاطع وهيك قصص) وبدرس البرمجة بلشو معنا بقصص سهلة كنت متعلمها عالنت خلال اول اسبوعين بالشركة، العائق الوحيد بيبقى بس اللغة طبعا مع اني بحكي منيح ألماني بس الفكرة انو بالمدرسة وبالشركة مو متل كورسات اللغة الناس ما بتحكي بشكل بسيط وواضح وكلمات سهلة، هلق هالشي يوم عن يوم عبخف أكتر وأنا بلشت أقرأ الكتب تبع المدرسة والشركة واحفظ الكلمات يللي رح تلزمني ديما بهالمجال يعني يوم عن يوم عبتسهل عليي اكتر.
يللي حابب يفوت بهالمجال بحب انصحو انو يعمل كم كورس اونلاين بأساسيات البرمجة، لا أكثر. وكتير رح يساعد انك تحفظ شي كم مصطلح بهمو المجال بالألماني.
ع كل حال هي تجربتي لهلق ولسه المشوار طويل بس أنا قدها وقد أبوها والله لنكيف
يللي حابب يسأل أي شي بهالخصوص انا جاهز ارد بأي شي كون متأكد منو
تحياتي لهالصفحة المحترمك ولكل واحد حابب يتطور وما يقعد عالة عالدولة والشعب يللي ماقصر معنا.

يللي حابب الفرع بحب انصحو بكورس مجاني اسمو cs50 مقدم من جامعة هارفارد، بتلاقو الكورس ع منصة ال tdex الكورس بركز عالمفاهيم الاساسية البسيطة للبزمجة
وغير هيك، احفظ مصطلحات احفظ مصطلحات بهالمجال قد مافيك