المهنة 26 Werkzeugmechaniker تصنيع القوالب

تجربة طالب في اختصاص Werkzeugmechaniker
تصنيع القوالب

Werkzeugmechaniker
هاد المجال بالعربي اسمو تصنيع قوالب الصب ،هلا هل المجال هو حرفي بحت يعني بالمجال منستعمل المخرطة المفرزة ماكينات ال cnc حتى بجوز يكون في أشغال يدوية مثل المنشار المبرد لحام وهل القصص .

هو بكون أعلى مجال يدوي من حيث الراتب ومن حيث الخبرة ويلي بدرس بهل المجال بيقدر يشتغل ك industriemechaniker وبيقدر يشتغل zerspanungsmechaniker مدة الاوسبيلدونغ ثلاث سنوات ونصف بتعلم فيه شرح مفصل عن أدوات العمل شرح مفصل عن الماكينات وكيفية استعمالها فيه كمان مونتاج كتابة برامج cnc بتعلم فيه شوي عن الدارات الإلكترونية وكيفية عملها
كمان فيه رياضيات وفيزياء وفيه كمان مواد ثانية متل الألماني والسياسة و الديانة طبعا بعد الاوسبيلدونغ وحسب الشركة انت بتختار يا اما تشتغل بالقسم اليدوي يا اما بتشتغل عماكينات ال cnc او
اذا كان الواحد شغيل وقد حالو بشتغل بالمكتب كتابة برامج ومونتاج هﻷ بالنسبة للغة مارح اقدر قول سهل ولا رح قول صعب مشان المعنويات بس فيه كتير مصطلحات اختصاصية وتقنية وانا برأيي بحتاج اقل شي b2 وكتير دراسة لغة بالبيت فعليا يلي رح يدرس هل
المجال رح يدرس لغة اكتر من المواد اول فترة

سلبيات المهنة :انو المهنة فيها كتير رياضيات مثلثات وزوايا وفيثاغورس ويلي مابيعرف بهل القصص رح يتعذب كتير والعمل رح يكون بمعامل يعني غبرة وروايح لذلك يلي معو حساسية مارح تناسبو بس هاد الشيء منشوفو بكتير مهن غيرها مو هل المشكلة الكبيرة وانا برأيي المهنة مابتناسب البنات كتير وحتى قليل لتلاقي بنت بتشتغلها لأنو بتحتاج لطاقة كبيرة اذا كان الواحد بشتغل بالقسم اليدوي وبالنسبة للناس يلي بحبو النقاشات والعمل كمجموعات فهل المهنة مابتتناسب معهن لأنو رح تكون علاقتك بشكل كبير مع الماكينة حتى من الممكن تقعد 8 ساعات بدون ماتحاكي كلمة ..

هلا الإيجابيات هية انو راتبها كتيير منيح وللاشخاص يلي بحبو الماكينات والشغل اليدوي فهي ممتازة ألن ،بالنسبة ألي شفتها بتفيد بالحياة العملية من حيث الخبرة وكل شيء بتحفز عالتفكير المنطقي فيها تطور كتير يعني مابتوقف المهنة عند حد معين مثل ماقلت الواحد بيقدر يشتغل بأكثر من شغلة عن طريق هل المهنة وداخلة بكل المجالات الصناعية مثلا معامل الشوكولا معامل تصنيع السيارات بكل شيء صناعي .

بالنسبة كيف الواحد بيقدر يحصل على مقعد اوسبيلدونغ يفضل الواحد يكون معو ريال شولة مشان تزيد فرصتو وبهل المجال بالذات لازم تعمل بالمعمل براكتيكوم 3 أشهر مشان فرصتك تصير كبيرة تحصل على مقعد اوسبيلدونغ ومشان تأثبت جدارة انو انت بتناسبك هل المهنة