تجربة طالبة في اختصاص
Medizinisch Technische Laboratoriumsassistentin
الاختصار MTLA
اوسبيلدونغ فني مخبري تحاليل طبية هو اوسبيلدونغ مدرسي يعني العملي والنظري بلمدرسة مدته ٣ سنوات (٦ فصول دراسية ) الفصول الثلاثة الاولى بتكون بلمدرسة الفصلين الرابع والخامس بيكون فيهم براكتيكوم بمخبر والفصل السادس تحضير للفحص النهائي يلي بيأهل الطالب يمارس المهنة ….
مافي راتب خلال الاوسبيلدونغ بيحق للطالب يقدم على بافوغ مدرسي ومابيرجع منو شي بعد الدراسة …وفي مدارس بتطلب رسم شهري من الطالب…
التقديم : علنت بيشوف المتقدم المدارس يلي بمنطقته وشروط التقديم ووقته ….مطلوب لغة B2 واقل شي صف عاشر واهتمام بلمواد العلمية.
في بعض المدارس بتعمل فحص قبول بلكيمياء و الفيزياء والرياضيات والعلوم الاسئلة بتكون اختيار من متعدد …معلومات أساسية وبسيطة بهي المواد كمان في مقابلة اسئلة عامة عن شخصية المتقدم وليش اختار هلمهنة ….واحيانا في اختبار عملي هو انو بيكون في ورقة مكتوب فيها طريقة عمل لتجربة بسيطة ولازم الواحد يطبقها …..
مجالات العمل بعد الدراسة بتكون بمخابر المشافي ومخابر التحاليل الطبية والنسج والخلية ومراكز الابحاث
تجربتي بلفصل الاول كانت على الشكل التالي :
النظري : فيزياء كيمياء علوم من معلومات المرحلة الثانوية – رياضيات حسابات بسيطة إلها علاقة بلكيمياء _ احصاء _ كمبيوتر _ تعقيم _ نسج _ تشريح فيها مصطلحات لاتيني ..
عموما النظري في صعوبة بس مع الدراسة والترجمة مو مستحيل لو حتى مافهم الطالب كل المعلومات بلدرس .
العملي : دمويات _ كيمياء عامة _ كيمياء سريرية _ نسج _ علم الخلية _ أحياء دقيقة …بلعملي لازم الطالب يفهم كتير منيح مشان يقدر يطبق .
بنهاية السنة الاولى لازم الطالب يعمل براكتيكوم عناية بلمرضى كمان .
الإيجابيات:انو هاد الفرع بيجمع الكيمياء والعلوم والطب بنفس الوقت…. المواد الاختصاصية النظري فيها كتير مرتبط بلعملي يعني النظري مالو ممل وبلمستقبل المخبر الطبي فيه عدة أقسام يعني الشغل ما رح يكون ممل وهاد بالإضافة انو دائما في طرق عمل وأجهزة جديدة.
السلبيات:الدوام طويل بلأوسبيلدونغ يعني أغلب الأيام من 8للساعة 5 والعطلة لازم تدرس فيها منيح. المهنة خطرة نوعا ما لإنو بنكون على تماس مباشر مع العوامل الممرضة الموجودة بسوائل الجسم بس مع اتباع تعليمات السلامة بالمخبر واللقاحات الدورية بيخف كتير الخطر.
هي كانت تجربتي بتمنى كون فدتكم وبتمنى التوفيق للجميع