تجربة طالب في اختصاص ميكانيك سيارات
KFZ Mechatroniker
صارلي حوالي ٥ اشهر اني دا اسوي اوس بلدونغ بهذا الاختصاص بشركه ميستوبيشي للسيارات الصغيره فقط
احب انطي بعض معلومات للشخص الي يحتاج يدخل لهذا الاختصاص
اول شي عندك شيء اسمه براتيكيوم وهذا اقل شي المده يكون اسبوعين
لازم الشخص بهالفتره يثبت نفسه بالشغل وحتى لو كانت خبرتك قليله بالعمل
اثبات النفس بالتواصل والحركه وعدم الجلوس ابدا .
لازم تكون دقيق في العمل وكذلك في الوقت.
لازم تكون عندك خلفيه بسيطه عن المصطلحات الي تحتاجهن بهالفتره
واهم شي قبل لتدخل براتيكيوم حاول تحفظ اسامي العده الخاصه للعمل لان اكيد انت حتكون فقط مساعد للاسطا او للمايستر .
يعني يكولك جيبلي مفك براغي او عربه الدهن او عربه دهن البريك ومن هالامور
فاذا تريد تثبت نفسك حقيقي احفظ مصطلحات العمل.
مساله ثانيه حيحاول احد العمال يتقربون منك بالحديث ويدخلون بحياتك الشخصيه وبدينك
فخليك جدا طبيعي وحتى لو يسالك عالدين حاول بالفترة الاولى تبتعد عن هالامور واذا سالك انت تصلي فللافضل جوابك يكون لا حتى يعرف الشيف انتا مراح تضيع وقتك للعباده او خلق مشاكل( ملاحظه لحد يجي يتفلسف براسي ويكون الدين وهالامور – الدين كلنا نعرفه – بس متطلبات العمل تفرض عليك هالشي حتى تحصل ع مقعد اوس بلدونغ)
فارجو من الكل لحد يعلقلي على مساله دين.
مساله مهمه اخيره حاول بهالفترة تكون علاقه بسيطه وحلوة ويه الشخص الي ثابت وياه بالعمل لان هو نفسه الي حيوصل تقرير كامل عنك .
اني من خلال فتره ٥ اشهر استطعت اقوي اللغه الالمانيه اكثر من قبل
ولكن اكو مشكله بسيطه والاغلب يشكو منهه هي المدرسه
المدرسه اذا متابعهه بشكل يومي فراح تتعب هواي
والصراحه المدرسه شويه ملل وكلمات جديده تدخل بعقلك
تكدر ٥٠ % تفتهم والباقي متفهمه
ومع ذلك بمرور المستقبل تكدر تتجاوز هالشيء
اني عندي ٢ اصدقاء لغو الاوس بلدونغ بسبب الدراسه وبسبب مكان العمل
بعض الحالات مكان العمل ميخليك تشتغل مجرد تنضف والسبب هو مواثق من عملك فلهذا السبب اكول افرض نفسك وشخصيتك بالعمل حتى يثقون بيك وخليك دقيق ونضيق جدا بالعمل وحاول اي شي تشوفه جديد تسال عنه بدون اي خجل .
مصلحه ميكانيك سيارات مصلحه حلوة وما يحتاج شهاده قوية
المهم بكل هذا يحتاج اهتمام بهالموضوع . يعني اذا مزاجك بهالعمل ادخل بيه .
مساله اخيره للمعلومات … العمل في المانيا يختلف عن العرب .. يعني حتبقى دومك نضيف ومرتب لان انتا تلقائي كل ساعه تنضف ايدك حتى تكتب على العقد….
لمزيد من المعلومات حول الإختصاص تابع المقال التالي :
شرح مهنة ميكانيك السيارات