المهنة 14 الإدارة الصناعية


نعرض اليكم بعد اراء طلابنا السوريين المشاركين في التدريب المهني للمهن
سيكون هنالك سلسلة للمهن حسب آراء السوريين
#من_خبراتنا
المهنة رقم 14 Industriekaufmann
بالعربي ما يسمى : موظف الإدارة الصناعية

اسمي ضياء من سوريا, عمري 32 سنة, حاصل على بكالوريا تجاري مقيم قرب ديسلدورف منذ 3 سنوات.
بدي خبركن عن تجربتي بالحصول على فرصة تدريب مهني اختصاص بائع في الشركات الصناعية Industriekaufmann.
بالبداية طبعا بدأت بتعلم اللغة حتى مستوى B1 وبعدها عملت دورة لغة متعلقة بالعمل (لغة B1+ رياضيات + كومبيوتر) لمدة 6 أشهر ومن ضمن الدورة كان في براكتيكوم لمدة شهر.
طبعا مفتاح الحصول على التدريب بالنسبة الي كان البراكتيكوم, بلشت دور على براكتيكوم عن طريق المرشدة الاجتماعية يلي كانت تساعدنا بالهايم وبالفعل لقيت اكتر من براكتيكوم وكان سبب اختياري لهي الشركة لانها شركة عالمية وبالمقابلة فهمت انو في فرصة تدريب مهني.
خلال البراكتيكوم كان ماعندي اي مشكلة بالشغل لاني كنت اشتغل بسوريا كمان بشركة صناعية وعندي خبرة بالعمل المكتبي وهنن انتبهوا لهالشي وبنهاية البراكتيوم قدمولي عرض اني اعمل اوسبيلدونغ عندن وطبعا وافقت من دون تردد.
كان في وقت ليبدأ الاوسبيلدونغ مشان هيك الجوب سنتر بعتني على مدرسة وعملت فيها B2+ والجوب سنتر رفض اني بلش متل الباقي باول ايلول, فالشركة خلتني بلش ببداية حزيران.
بالنسبة للراتب والدوام والمدرسة حسب مافهمت الموضوع مالو مقياس محدد, المقصود كل مدرسة الها منهاج وكل شركة عندها نظام داخلي. طبعا بالنهاية الفروقات بسيطة ولح خبركن عن الشركة والمدرسة يلي بداوم فيهن:

  • الدوام بالشغل 3 أيام والمدرسة يومين ( اذا بالمدرسة اكتر من 6 حصص مافي داعي ارجع للشغل بس اذا اقل لازم كمل الدوام بالشركة)
    مواد المدرسة هنن كالتالي:
  1. Geschäftsprozesse/Betriebswirtschaftslehre ( اهم مادة بكل الاختصاص, بتشرح عن الشركات وعن تامين المواد الاولية وكيف ممكن تحسب الكميات يلي بدك تطلبها وكيف ممكن تحلل احتياجات الشركة)
  2. Wirtschafts- und Sozialprozesse ( بتحكي عن القوانين بالبيع والشراء والعقود وحتى عن قوانين الاوسبيلدونغ وشو الواجبات والحقوق وبتحكي عن دراسة السوق كعرض وطلب)
  3. Organisationslehre ( هي المادة تابعة للمادة الاولى وبتحكي عن انواع الهيكل التنظيمي بالشركات والوصف الوظيفي وفيها عملي على الكمبيوتر متل البوربوينت وكيف تخطط لمشروع او تعمل خريطة تدفق لعملية)
  4. Mate ( كمان تابعة للمادة الاولى وطبعا رياضيات بسيطة وممتعة)
  5. Rechnungswesen ( محاسبة متل يلي بسوريا مدين ودائن وطبعا بيركزو على الضرائب بشكل كتير كبير)
  6. Politik ( فيها تنوع شوي منحكي بشكل عام عن السياسة وشوي منحكي عن  مجلس تمثيل الادارة وكمان عن التامين الالزامي بالمانيا )
  7. Religion ( بتحكي عن الاخلاق والضمير وعن تبرع الاعضاء والاعياد وطبعا هي مادة اختيارية بيقدر الواحد مايحضرها, شخصيا حضرتا واعتبرتا دروس لغة)
  8. طبعا في مواد تانية بتجي بالسنة التانية والتالتة.

وبالنسبة للشغل لازم كل كم شهر داوم بقسم وطبعا المهام لح تختلف من قسم لتاني وبالنسبة للمدة متل ماقلت كم شهر بس مافي مقياس لانو كل شركة الها خصوصيتها, ولحد الان صرت مداوم بقسمين ويلي هنن إدارة التوريد وقسم المشتريات.
المهام يلي توليتا بالشركة مو صعبة كتير مثلا:

  • ارسال المواد الاولية للمصانع على برنامج الساب
  • استقبال المواد المنتهي تصنيها على برنامج الساب
  • تجهيز قوائم الشحن والفواتير للزبائن
  • عمل تقارير اسبوعية عن طلبات الشراء التي لم يتم توريدها بوقتها المحدد
  • ادخال تاريخ توريد البضائع وكمياتها على برنامج الساب

طبعا بالشركة في موضوع مهم ويلي هو ورشات العمل والمشاركة فيها شبه اجباري, الفكرة انو الطلاب بيتوكلو مهمة معينة ولازم هنن يعملوها من اولها لاخرها وكمثال تجهيز برنامج لاستقبال الطلاب الجدد ( بالنسبة لشركتنا البرنامج اسبوع كامل, خلالو بيتعرف الطالب على كل شي بالشركة)

بالنسبة للامتحانات بشكل عام مقسمة لعدة اقسام:

  • المدرسة: كل فترة في امتحان وفي تقييم للشفهي وهاد كلو بيكون بشهادة المدرسة مذكور
  • IHK: امتحان نصفي وامتحان نهائي

الإيجابيات بالتدريب المهني:

  • بتقدر تشوف النظري يلي عم تاخدو بالمدرسة على ارض الواقع وحتى ممكن تعتازو بالشغل.
  • المدرسة هي يومين بالاسبوع, مشان هيك مافي ضغط كبير بالنسبة للدراسة.
  • فرصة ايجاد عمل بنفس الشركة يلي عم تتدرب فيها
  • راتب التدريب جيد نوعا ما وبتقدر تعتمد عليه اذا البيت اجارو رخيص.

السلبيات:

  • اللغة اللغة اللغة …….. المواد بالمدرسة سهلة وممتعة بس بسبب الكلمات الاختصاصية بتحس حالك مو فهمان شي
  • بالنسبة للشغل مافي اي سلبيات ماعدا نفس النقطة الاولى ويلي هي اللغة

الخلاصة:
اختصاص بائع في الشركات الصناعية اختصاص حلو كتير وفي كتير خيارات, الاسم بيوحي انك حتكون بس بقسم المشتريات وهاد الشي خاطئ, ممكن يشتغل الواحد باي قسم ضمن شركة صناعية من المحاسبة للموارد البشرية مرورا بالمبيعات والتسويق للمشتريات ولادارة التزويد وهي المتعة يلي لقيتا بالتدريب لانو مالك مضطر تكون بمكان واحد وبس
نصيحتي بالنسبة للغة انو الواحد يبدأ بالتدريب المهني, بس مايوقف ابدا من تعلم اللغة والاهم حفظ الكلمات الاختصاصية.

لمزيد من المعلومات حول المهنة يمكنكم اتباع الرابط:
شرح عن مهنة Industriekaufmann موظف الإدارة الصناعية